Gáhtte gollegiela 2005

Isak Saba lea Sámi Soga lávlagis avččuhan min  gáhttet gollegiela.

Dán jagi lea ge 130 jagi dassái go Saba riegádii, ja mii hálidat dán fuomášuhttit iešguđet láhkái.

Min ulbmil lea Unjárgga olbmuid oažžut čevllohallat sámi kulturduogážiin, ja oaidnit riggodagaid das go eallit máŋggakultuvrralaš servodagas.

Go máŋgga dásis bargat, de doaivut nagodit nannet sámegiela árvvu, ja erenoamážit Unjárgga suopmana árvvu. Mii eat áiggo dušše gielain bargat, muhto maiddái sámi identitehtain. Mii jáhkkit nannejuvvon identitehtadovdu dahká ahte eambbosat válljejit geavahit sámegiela iešguđet lágán oktavuođain. Mis leat doaimmat mat heivejit buohkaide …quot; njuorat mánáid rájes gitta min boarraseamusiidda.